Müharibə zamanı ölkə qanunlarını və hərbi rejim qaydalarını pozanduğuna görə həbs edilən, heç bir titulu olmasına baxmayaraq özünün cəmiyyətə idmançı kimi təqdim edən Kamil Zeynallı aparıcı Ülvira Qarayevanın suallarını cavablandırıb. "YouTube”da yayımlanan "AStar News” verilişində aparıcının suallarını cavablandıran K.Zeynallı həbsi ilə bağlı sensasion fikirlər səsləndirib. 

Aparıcının ''Sən Azərbaycan qanunlarına meydan oxuyursan və tanımırsan?'' sualına cavab olaraq bildirib ki, elə qanunlar var ki, vətən uğrunda pozulmalıdır: "Xırda qanunlar var. Sutkanı ona görə verirlər də. Son həbsim polisə müavimət deyildi, yardım aparmaqla bağlı idi. Sadəcə hərbidə bəzi vəzifəli şəxs işdən çıxarılmasın deyə qarşıma variant qoydular. Amma sonra hərbiçilər məni yolda qoyub qaçdılar". 

"Mən Kəlbəcərə hərbiçilərlə keçmişdim. Məni ora hərbiçilər aparmışdılar. Demişdilər ki, sənə komandirdən icazə almışıq. Maşını 400-500 əsgər üçün ləvazimatlarla doldurdum. Hərbi maşınların araxasına yığdıq, qalxdıq Kəlbəcərə. 3 gün əsgərlərə apardığım təminatı paylayıb qayıdanda postda məni saxladılar. Polislər mənə dedilər ki, maşından düşün, sizi axtarışa veriblər. Mənə dedilər ki, əgər desən ki, Kəlbəcərə hərbiçilərlə qalxmısan, onları işdən çıxara bilərlər. Ən yaxşısı belə demək lazımdır ki, guya Toğana postunda polislərə müqavimət göstərmisən. Amma mən heç vaxt polisə müqavimət göstərə bilmərəm. 30 sutka verdilər, 9 gündən sonra aydınlaşdırıldı, tapşırıq verildi ki, işə düzgün baxılsın. Mən həbsdən çıxandan sonra dövlətimdən və polisimdən şikayət etməmişəm. Haqsız yerə tutulmamışam. Həbsdən çıxandan sonra da demişəm ki, Allah dövlətimi, prezidentimi və Vilayət Eyvazovu qorusun"-deyə K.Zeynallı özünə haqq qazandırıb.

Daxili İşlər Nazirliyinin Mətbuat Xidmətinin KİV və İctimaiyyətlə əlaqələr şöbəsinin rəisi, polis mayoru Elşad Hacıyev Criminal.az saytına açıqlamasında K.Zeynallının polislə bağlı səsləndirdiyi fikirlərə münasibət bildirib. Nazirlik rəsmisi K.Zeynallı tərəfindən səsləndirilən iddiaları qəti olaraq təkzib edib: "Polisin belə ifadələr səsləndirməsi inandırıcı görünmür. Deyilən cəfəngiyatdır".