YAP-çı deputatın Ukraynada mal-qara biznesi üzə çıxdı

YAP-çı deputatın Ukraynada mal-qara biznesi üzə çıxdı
Загрузка...
Avropada yaşayan araşdırmaçı jurnalist Cavanşir Həsənli Milli Məclisin deputatı, "Qasid” Açıq Səhmdar Cəmiyyətinin (ASC) sədri Mirkazım Kazımlının biznesi ilə bağlı məlumat yayıb. Criminal.az xəbər verir ki, jurnalist Mirkazım Kazımlının Ukraynada kənd təsərrüfatı biznesinə malik olduğunu iddia edir. Cavanşir Həsənli qeyd edib ki, deputat Mirkazım Kazımlı və oğlu Səid Kazımov Ukraynada 2 şirkət açıb:
"Deputat Mirkazım Kazımlı mətbuatın pulunu mənimsəyib, aparıb Ukraynada mal-qara alverinə girişib. Bir vaxtlar ölkənin ən böyük qəzet yayımı firmalarından olan "Qasid"i də böyrü üstdə qoyub. "Qanuna əsasən, Milli Məclisin deputatları bizneslə, sahibkarlıq sahəsi ilə məşğul ola bilməz. Ona görə də mənim heç bir biznesim yoxdur". 

Bunu özü demişdi bu yaxınlarda. Amma deputat Ukraynada iki şirkət açıb, hər ikisini oğlu Səid Kazımovun adına rəsmiləşdirib. İlk olaraq 2015-ci ilin fevralında Çerniqovsk vilayətində AL RAZZAQ MMC-ni (ТОВАРИСТВО З ОБМЕЖЕНОЮ ВИДПОВИДАЛЬНИСТЮ АЛ-РАЗЗАГ) 20 min qrivna nizamnamə kapitalı ilə qeydiyyatdan keçirib. Şirkətin fəaliyyət sahəsi kimi "mal-qaranın topdansatışı" göstərilib. Sənədlərdə qeyd olunur ki, Bakı şəhəri, Parlament prospekti 2 B, mənzil 58-də qeydiyyatda olan Səid Mirkazım oğlu Kazımov şirkətin 100 faizlik sahiblik hüququ ilə tək hissədarıdır.
Belə anlaşılır ki, cənab Kazımovun şirkəti Ukraynadan Azərbaycana öküz, inək, qoyun-quzu daşıyır. Anatoli Lapinski adlı Ukrayna vətəndaşını da şirkətə müdir qoyublar ki, ordakı işləri idarə etsin. Deputatın və oğlunun alveri o qədər yaxşı gedib ki, ət və konserv məhsullarının biznesinə də girişiblər. Bu məqsədlə ötən ilin avqustunda Kiyevdə "Mir-M.L" MMC-ni (ТОВАРИСТВО З ОБМЕЖЕНОЮ ВИДПОВИДАЛЬНИСТЮ МИР-М.Л) qeydiyyatdan keçiriblər. Qeydiyyat nömrəsi 42491862, hüquqi ünvanı Qoloseevsk rayonu, akademik Vilyams küçəsi 6-dır. 
Şirkətin 67 %-lik hissəsi Mirkazım Kazımovun oğlunun adına, 33 %-i isə Xarkov vilayətində yaşayan Cəmaləddin İbrahimov adlı şəxsin adına rəsmiləşdirilib. Nizamnamə fəaliyyəti ət emalı və konservləşdirilməsindən, yəni "tuşenka" hazırlamaqdan ibarətdir".
 YAP-çı millət vəkili Demokrat.az-a sözügedən iddiaların doğru olmadığını bildirib: "Ukraynada mal-qara biznesilə məşğul olmağım barədə xəbərlər yalandır. Mənim Ukraynada heç bir biznesim yoxdur".
Mirkazım Kazımlı Ukraynada oğlunun biznesinin olub-olmaması məsələsinə isə konkret cavab vermək istəməyib: "Oğlumun 38 yaşı var, cavandır və hazırda Azərbaycanda yaşayır. Bəlkə də oğlumun orada biznesi var, bunu mən dəqiq bilmirəm. Oğlum bu barədə mənə heç bir söz deməyib. Ancaq mənim Ukraynada hər hansı şirkətim yoxdur".
Загрузка...
Загрузка...

Xəbər lenti