Xanlar Vəliyev mövqeyini niyə dəyişdi? - BİR ZAMANLAR "TƏRTƏR İŞİ"Nİ "NAĞIL" ADLANDIRMIŞDI

Xanlar Vəliyev mövqeyini niyə dəyişdi? - BİR ZAMANLAR
Xanlar Vəliyev ilk dəfə "Tərtər işi”ndən danışdı Hərbi Prokuror Xanlar Vəliyev "Tərtər işi" ilə bağlı açıqlama verib. Xanlar Vəliyev "Türkdilli dövlətlərin prokurorlarının cinayətkarlığa qarşı mübarizədə rolu: Real imkanlar və müasir çağırışlar” mövzusundakı beynəlxalq konfransda jurnalistlərə açıqlamasında bildirib ki, onlara daxil olan məlumat əsasında 2017-ci ilin may ayında cinayət işi başlanıb:
"İstintaq zamanı bir neçə adamın dövlətə xəyanət etdiyi sübut olundu və onlara ittiham verildi, məhkəmə məsuliyyətinə cəlb olunmaları üçün haqlarında ittiham aktları ilə birlikdə cinayət işləri məhkəmələrə göndərildi. Məhkəmələr tərəfindən təqsirləndirilən şəxslərə hökm çıxarıldı. Sonra həmin hökmlərdən apellyasiya və kassasiya şikayətləri verildi. Göstərilən şəxslərin həmin cinayətləri törətməsi barədə verilmiş hökmlərin əsaslı qanuni olduğu müəyyən olunduğundan hökmlər qüvvədə saxlanıldı.
Bununla yanaşı, Hərbi Prokurorluq tərəfindən aparılan istintaq zamanı müəyyən olundu ki, istintaqdan öncəki bir neçə gün dövlətə xəyanətdə şübhəli bilinən ayrı-ayrı şəxslərə qarşı qanundankənar çox ciddi fiziki zorakılıq tədbirləri həyata keçirilib. Nəticədə biz cinayət işi başlayanadək bir nəfər şəxs vəfat etmişdi. Mən şəxsən özüm, eləcə də baş prokurorun birinci müavini Rüstəm Usubov, Hərbi Prokurorun müavini Şəfahət İmranov, idarə rəisi, baş prokurorun köməkçisi ilə birlikdə həmin hərbi hissəyə getdik. Biz müəyyən etdik ki, həmin hərbi hissədə kütləvi şəkildə hərbçilərə qarşı qeyri-qanuni formada işgəncə tədbirləri həyata keçirilir. Mənim tələbimlə Müdafiə Nazirliyinin Tibb xidmətindən gələn böyük bir briqada həkimləri oradakı şəxsləri müayinə etdi. Çox ciddi fiziki zorakılıq tədbirlərinə məruz qalanlar Mərkəzi Hospitala yerləşdirildilər. Həmin adamların böyük bir qisminin həyatı xilas edildi. İşgəncə faktı ilə bağlı cinayət işi başlandı və 16 nəfər müxtəlif vəzifəli şəxslər məsuliyyətə cəlb edildi. Sonra barələrində müxtəlif uzunmüddətli azadlıqdan məhrumetmə ilə bağlı hökmlər verildi. Onların hökmdə verdikləri şikayətləri apellyasiya və kassasiya instansiyaları təmin etmədi". 

Pərviz Həşimli 
Jurnalist Pərviz Həşimli yazır ki, Xanlar Vəliyevin bu açıqlaması təəccübə səbəb olub. Belə ki, bir neçə ay əvvəl Xanlar Vəliyev "Tərtər işgəncəsi”ni "nağıl” adlandırmışdı. Hərbi prokuror belə bir halı, ümumiyyətlə inkar edirdi. O, demişdi: "Mən bu iddiaları eşitmişəm. Amma yalandır. Ümumiyyətlə, hesab edirəm ki, bu, nağıldır və kim danışırsa, nağıl söyləyir”.
”Göründüyü kimi Tərtər qətliamı zamanı 11 nəfər vətəndaşın işgəncə ilə öldürülməsini inkar etməyə çalışan hərbi prokuror ictimai etirazların fonunda geri çəkildi. Yerigəlmişkən, onu da vurğulayaq ki, AŞ PA yaxın zamanlarda "Tərtər İşi” haqqında qətnamə qəbul etməyə hazırlaşır. Görünür, Hərbi Prokuorluğun rəhbərliyi indi dərk edir ki, hərəkətsizlik və inkarçı mövqe ölkə adına utanc gətirəcək”-deyə jurnalist vurğulayıb.

Xəbər lenti