Rusiyada "Roskosmos” rəhbərinin informasiya siyasəti üzrə müşaviri, jurnalist İvan Safronov dövlətə xəyanət ittihamı ilə Federal Təhlükəizlik Xidmətinin əməkdaşları tərəfindən tutulub. Rusiya KİV-ləri xəbər verir ki, onu hərbi sirr mahiyyəti daşıyan məlumatı NATO ölkələrindən birinin xüsusi xidmət orqanlarına ötürməkdə ittiham edirlər.

Jurnalistin vəkili Yevgeni Smirnov jurnalistlərə bildirib ki, Safronovun barəsində qaldırılmış cinayət işi Çexiyanın xüsusi xidmət orqanlarına işləməklə bağlıdır. Safronovun müdafiəsi onun həbsinin jurnalist fəaliyyəti ilə əlaqəli olduğunu qeyd edir.

 

Belə ki, FTX onu Rusiyanın Yaxın Şərq ölkələrinə və Afrikaya silah təchizatına dair informasiyaları Çexiyanın xüsusi xidmət orqanlarına ötürməkdə günahlandırır. Moskvanın Lefortovo məhkəməsi Safronovun barəsində iki aylıq həbs qətimkan tədbiri seçib. Məlumata görə jurnalist ifadə verməkdən imtina edir. "Roskosmos”da təsdiq ediblər ki, Safronov dövlətə xəyanət ittihamı ilə həbs edilib, amma onun həbsinin korporasiyadakı fəaliyyəti ilə əlaqəsi yoxdur. 

"Kommersant” təxmin edir ki, Safronovun həbsi onun Rusiyanın Misirə Su-35 qırıcılarını satmaq planları barədə 2019-cu ildə dərc edilmiş məqaləsi ilə əlaqəlidir. Həmin məqalədən sonra ABŞ dövlət katibi Mayk Pompeo Qahirəni sanksiyalarla hədələyib və Rusiyadan qırıcıları almaqdan imtina etməyə çağırıb. "Moskovskiy Komsomolets” isə yazır ki, Safronovun həbsindən sonra prezident Vladimir Putin "Roskosmos”un rəhbəri Dmiri Roqozinlə planlaşdırılan görüşünü izahsız təxirə salıb. Lakin Putinin mətbuat katibi Dmitri Peskov bunun doğru olmadığını, prezidentin Roqozinlə görüşünün ümumiyyətlə planlaşdırılmadığını deyib.

İvan Safronov əvvəllər "Kommersant” və "Vedemosti” qəzetlərində işləyib, hərbi-sənaye kompleksinə aid mövzulardan, Rusiyanın müdafiə və təhlükəsizlik məsələlərindən yazıb. İ.Safronov eyni ad və soyadı daşıyan jurnalist, "Kommersant”ın keçmiş əməkdaşı İvan Safronovun oğludur. Onun atası 2007-ci ildə müəmmalı şəraitdə həlak olmuşdu. Həmkarları hesab edirdi ki, Safronovun ölümü onun üzərində işlədiyi araşdırma ilə əlaqəlidir. Həmin araşdırmada Rusiyanın Yaxın Şərq ölkələrindən birinə gizlicə silah satmaq planlarından bəhs edilməli idi və məqalənin dərci beynəlxalq qalmaqala səbəb olardı.