"Rəis müavini öz otağında məni sillə-təpiklə vurdu, küçə söyüşləriylə təhqir etdi, sonra da dizüstə çökdürdü, üzr istəməyimi tələb etdi”. Mingəçevir şəhər sakini Sərdar Əsgərov Criminal.az-a danışır ki, yanvarın 26-da səhər saatlarında onu yaşadığı evin qarşısından zorla maşına mindirərək Mingəçevir şəhər polis şöbəsinə aparıblar. Orada şöbənin rəis müavini onunla kobud davranıb, sosial şəbəkələrdəki yazılarına görə üzr istəməsini tələb edib.

"Səhər saat 10 radələrində yaşadığım ünvanın qapısını mülki geyimli bir nəfər döydü. Dedi, onu mənim dalımca Mingəçevirin Məşğulluq Mərkəzindən göndəriblər, guya mənə iş təklifi var və onunla birlikdə Məşğulluq Mərkəzinə getməliyəm. Qapıya çıxdım, dedim, maraqlıdır, axı mən iş üçün heç yerə müraciət etməmişəm. Elə həmin adamla danışırdım ki, qəfil daha üç mülkigeyimli şəxs mənə hücum etdi, sən demə bunlar Məşğulluq Mərkəzindən yox, polis şöbəsindən gəliblər, polis işçiləridir. Beləcə, məni aldadıb, evdən çıxarıb, azyaşlı övladımın gözü qarşısında zor tətbiq edərək maşına mindirib polis şöbəsinə götürdülər”.

Sərdar Əsgərovun sözlərinə görə, onu şöbənin binasının 3-cü mərtəbəsinə - rəis müavini Cavid Talıbovun otağına çıxarıblar. Otağa daxil olan kimi rəis müavini onu təhqir edib.

"Mənə sillə-təpik vurdu, nəsil-nəcabətimin ünvanına elə söyüşlər işlətdi ki, dilimə gətirə bilmirəm. Dedi, sən kimsən ki, icra hakimiyyətinin başçısına, polis rəisinə sosial şəbəkələrdə ağzına gələni yazırsan, deyirsən? Sonra məni diz çökməyə, üzr istəməyə məcbur etdi. Polis işçiləri boynumun ardından, ayağımdan vuraraq mənə zorla diz çökdürdülər. Cavid Talıbov isə əlində telefonla məni çəkməyə başladı və tələb etdi ki, üzümü telefonun kamerasına tutub icra hakimiyyətinin başçısından da, polis rəisindən də üzr istəyim”, - şikayətçi bildirir.

Sərdar Əsgərov deyir, polis şöbəsinə aparılmamışdan əvvəl o, "Facebook” səhifəsində Mingəçevir Mənzil Abadlaşdırma İdarəsində dalandar vəzifəsində işləyən qadınların 2 ildən çoxdur maaş almamaları, pandemiya vaxtı yardımlardan məhrum olmaları ilə bağlı həm yazılı, həm də canlı yayım şəklində çıxışlar edib. Mingəçevir Şəhər İcra Hakimiyyətinin başçısı İlham İsmayılovu, aksiya keçirən dalandar qadınların aksiyasına mane olan Mingəçevir Şəhər Polis İdarəsinin rəisini tənqid edib. Polis şöbəsinin rəis müavini də ondan aşağılayayıcı şəkildə tələb edib ki, həm başçıdan, həm polis rəisindən üzr istəsin. 

Sərdar Əsgərovun deməsinə görə, həmin gün məhkəmə onu cərimələyəndən sonra evə buraxılıb. Şöbəyə gətirilərkən əlindən alınmış iki telefonunu isə şöbənin rəis müavinindən zorla geri ala bilib: "Yanvarın 26-da saatlarla polis şöbəsində saxlanıldıqdan sonra məni təxminən saat 16 radələrində məhkəməyə apardılar, İnzibati Xətalar Məcəlləsinin 510-cu maddəsiylə 50 manat cərimələdikdən sonra evə buraxdılar. Ancaq telefonlarım rəis müavinində qalmışdı və bir neçə günlük süründürməçilikdən sonra nəhayət, telefonlarımı geri ala bildim. Hər iki telefonu format etmişdilər deyə, sosial şəbəkələrdəki səhifələrim silinmişdi. Rəis müavini məni hədələdi ki, bir də sosial şəbəkələrdə yazsam, bir yolunu tapıb, məni həbsə atdıracaq”.

Mingəçevir Şəhər Polis İdarəsindən Meydan TV-yə bildirilib ki, Sərdar Əsgərov yanvarın 26-da xırda xuliqanlığa görə saxlanılıb, barəsində inzibati protokol tərtib olunub, Mingəçevir Şəhər Məhkəməsinə göndərilib, İnzibati Xətalar Məcəlləsinin 510-cu maddəsiylə təqsirləndirilərək 50 manat məbləğində cərimələnib. Polis şöbəsindəş bildirilib ki, Sərdar Əsgərovun təhqirə və fiziki təzyiqə məruz qalmasıyla bağlı dedikləri həqiqətəuyğun deyil. Mingəçevir Şəhər İcra Hakimiyyətindən isə bildirilib ki, Sərdar Əsgərovun başçının sifarişiylə tutularaq polis şöbəsinə aparılmasıyla bağlı dedikləri böhtandır.

İcra hakimiyyəti onun sosial şəbəkələrdəki çıxışlarını şər, böhtan adlandırıb. Qurumdan Meydan TV-yə bildirilib ki, hətta Sərdar Əsgərova rəsmi məktub göndərilərək xəbərdarlıq da olunub.

DİN: "Sərdar Əsgərovun sosial şəbəkələrdə yayılan sonuncu müraciəti də müvafiq qaydada araşdırılacaq"

Daxili İşlər Nazirliyi sosial şəbəkələrdə Mingəçevir şəhər sakini Sərdar Əsgərovun polis şöbəsində təzyiqə məruz qalması ilə bağlı iddialarına münasibət bildirilib. DİN-in Mətbuat Xidmətinin Şəki regional qrupunun baş inspektoru, polis baş leytenantı Mahir Məsimov Criminal.az-a bildirib ki, S.Əsgərovun polis tərəfindən əsassız olaraq tutulması və guya döyülərək videoya çəkilməsi barədə sosial şəbəkələrdə səsləndirdiyi iddialar həqiqəti əks etdirmir və böhtan xarakteri daşıyır. Həmin fikirlərin heç bir hüquqi əsası yoxdur.

Əslində, yanvarın 26-da Mingəçevir şəhər ərazisində, ictimai yerdə S.Əsgərov ucadan nalayiq ifadələr işlədərək səs-küy salıb, ictimai asayişi pozaraq xırda xuliqanlıq hərəkətlərinə yol verib ki, bu da ətrafdakıların haqlı narazılığına səbəb olub. Həmin şəxs polis şöbəsinə gətirilib və barəsində protokol tərtib edilib və məhkəmənin qərarı ilə o, 50 manat məbləğində cərimə olunub.

S.Əsgərov məhkəmə iclasında əsəbi olduğu üçün səs-küy saldığını, nalayiq ifadələr işlətdiyini etiraf edib və tutduğu əməldən peşman olduğunu bildirib. Bununla belə, S.Əsgərovun sosial şəbəkələrdə yayılan sonuncu müraciəti də müvafiq qaydada araşdırılacaq və nəticəsindən asılı olaraq hüquqi qiymət veriləcək.