Pakistanda təyyarə qəzası: ölənlərin sayı 97-yə çatıb Pakistanda təyyarə qəzası: ölənlərin sayı 97-yə çatıb

Pakistanda təyyarə qəzası: ölənlərin sayı 97-yə çatıb
 Təyyarə yaşayış yerinə düşərək dağıntılar törədib
Kəraçi şəhəri yaxınlığında Pakistan Beynəlxalq Hava Yollarına məxsus sərnişin təyyarəsinin qəzası nəticəsində ən azı 97 nəfər həlak olub, Sind əyalətinin səhiyyə nazirliyi bildirir. İki sərnişinin hadisədən sağ çıxdığı məlumdur. Laxordan Kəraçiyə yollanan Airbus A320 laynerinin göyərtəsində 91 sərnişin və səkkiz heyət üzvü olub.
Cümə günü baş verən qəzanın səbəbləri barədə məlumat verilmir. Məlumdur ki, ilk uğursuz eniş cəhdindən sonra pilot texniki nasazlığın olduğunu bildirmişdir. Hadisə karantinə görə məhdudiyyətlərin yumşaldılması ardınca ticarət uçuşlarının bərpasına izn verildikdən bir neçə gün sonra yer alıb. Televiziya ilə təyyarənin yerə düşdüyü qəsəbədə küçələrdəki dağıntılardan keçən xilasetmə qruplarını görmək olar. Yerli hakimiyyət orqanları 97 nəfərin öldüyünü təsdiqləyir. Lakin bunlardan neçəsinin sərnişin və ya yerli sakin olduğu aydın deyil. 

Ölənlər arasında 19 nəfərin şəxsiyyəti müəyyən edilib. Sağ qalan iki nəfərdən biri Pəncab Bankının prezidenti Zəfər Məsuddur, yerli hökumətin nümayəndəsi bildirib. Hər iki nəfər təyyarənin önündə otururmuş.
Hadisənin şahidi güclü səs eşitdikdən sonra evindən bayıra çıxdığını deyir: "Dörd ev demək olar ki, tamamilə dağılıb, o qədər yanğın və tüstü var idi", - Məhəmməd Üzeyir Xan BBC-yə deyib. "Onlar, demək olar ki, mənim qonşularımdır, nə qədər dəhşətli bir şey olduğunu deyə də bilmirəm". 

BBC News Urducaya danışan Kanval Nazim insan qışqırıqlarını eşitdiyini və bir məscidə bitişik olan üç evdən yuxarıya doğru qalxan qara tüstü buludlarını gördüyünü deyir. Pakistan Beynəlxalq Havva Yollarının nümayəndəsinə əsasən, təyyarənin pilotu qəzadan əvvəl "texniki çətinliklərin" olduğunu bildirib. Geo televiziya kanalı mülki aviasiya idarəsindəki mənbələrə istinadən xəbər verib ki, təyyarə ilə əlaqə enişdən bir dəqiqə əvvəl itib.

Xəbər lenti