Milli Məclisin Beynəlxalq münasibətlər şöbəsinin müdiri İlkin Məmmədov öz "facebook" səhifəsində maşın satır. Jurnalist Cavanşir Həsənli yazır ki, cənab Məmmədov "Turbo.az" saytında satışa çıxardığı özünə məxsus Porsche Boxter GTS avtomobilinin elanını öz səhifəsində də yerləşdirib. 

Avtomobil 54 min dollara (təxminən 92 min manata) təklif olunub. Elanda qeyd olunduğu kimi bu komplektasiyada Azərbaycanda ikinci avtomobil yoxdur. Şöbə müdiri onu ikinci avtomobil kimi nadir hallarda sürüb, amma hansı zərurətdən satışa çıxardığı bəlli deyil. Məlum olan odur ki, bu aralar Milli Məclisdə "islahatlar başa çatıb" və İlkin Məmmədov yeni vəzifəsinə təyinat alıb.

O, keçmiş spiker Oqtay Əsədovun bacısı oğlunun qaynıdır. 

İ. Məmmədov "Qafqazinfo”ya bildirib ki, avtomobil ona məxsus deyil: "O mənim dostumun maşını idi. Bir ay əvvəl məndən xahiş etmişdi ki, elanı səhifəmdə paylaşım. Mən də burada heç bir qəbahət görmürəm və elanı paylaşmışam”.

Qeyd edək ki, məsələ ilə bağlı Milli Məclisin yeni mətbuat xidmətinin rəhbəri Ceyhun Əli ilə də əlaqə saxlamağa çalışdıq. C. Əli telefona cavab verməyib.