Məşhur apteklər şəbəkəsinin xanım direktoru "maska" əməliyatının qurbanı oldu Məşhur apteklər şəbəkəsinin xanım direktoru Məşhur apteklər şəbəkəsinin xanım direktoru

Məşhur apteklər şəbəkəsinin xanım direktoru
Загрузка...
Həyat yoldaşı "Maska" əməliyyatında tutulan şəxs məşhur apteklər şəbəkəsinin baş direktoru vəzifəsini itirdi. Criminal.az-ın əldə etdiyi məlumata görə, "Avromed" şirkətinin baş direktoru Əzizə Baxşıyeva bu gün tutduğu vəzifədən azad edilib. 
Fevralın 9-da Daxili İşlər Nazirliyi (DİN) Baş Mütəşəkkil Cinayətkarlıqla Mübarizə İdarəsinin əməkdaşları tərəfindən keçirilən "maska" əməliyyatında tutulanlar arasında Ə.Baxşıyevanın həyat yoldaşı Riad Məmmədov da var idi. 
Bloger Həbib Müntəzir hadisənin detalları ilə bağlı bildirmişdi ki, əməliyyat zamanı 115 saylı Şəki kənd seçki dairəsindən deputat seçilən Cavanşir Feyziyevə məxsus "Avromed" şirkətinin əməkdaşları da saxlanılıb.
Belə ki, "Avromed" şirkətinin baş direktoru Əzizə Baxşıyevanın həyat yoldaşı Riad Məmmədov əməliyyat zamanı saxlanılsa da, daha sonra sərbəst buraxılıb. O, əməliyyat zamanı çəkilən video və fotogörüntülərə də düşüb. 

"İlham Əliyev efirdə tibbi maskalara artan tələbatdan sui-istifadə edənlərin cəzalandırılacağını demişdi. Bundan sonra "Bandotdel" əməliyyat keçirdi və çinli, iranlı, azərbaycanlılardan ibarət dəstə üzvləri saxlanıldı. O dəstənin içində olanlardan, bandanın başı bilirsiz kim idi: Riad Məmmədov. Heç bir xəbər agentliyi xəbərlərində onun adını qeyd etməmişdi". "Kimdir bu şəxs? Saxta yolla Şəkidən deputat seçilən Cavanşir Feyziyevin sahib olduğu "Avromed" şirkətinin baş direktoru Əzizə Baxşıyevanın həyat yoldaşı, aptek müdiri Riad Məmmədov. Riadın görüntüləri TV-lərdə verilsə də, adını hallandırmadılar"- bloger qeyd edib. 

"Avromed" QSC baş direktorun işdən çıxarılması ilə bağlı açıqlama yayıb. Həmin açıqlamada deyilir:
Avromed QTSC hüquq-mühafizə orqanlarının apardığı operativ fəaliyyəti təqdir edir və bu kimi halların müəyyənləşdirilməsində yaxından əməkdaşlıq etməyə hazır olduğunu bildirir. Bəzi xəbər saytlarında keçirilən əməliyyat zamanı istintaqa cəlb edilənlər arasında "Avromed Company” QSC-nin baş direktorunun həyat yoldaşının olduğuna dair yazılar yerləşdirilib. Bununla bağlı bildirmək istəyirik ki, "Avromed” sahibkar Riad Məmmədova tibbi maska satışı həyata keçirməyib. Şirkətimiz bu məsələlərlə bağlı hüquq mühafizə orqanları ilə əməkdaşlıq etməyə hazırdır. Qeyd edək ki, Əzizə Baxşiyeva rəsmi olaraq 20 fevral 2020-ci il tarixindən istefa ərizəsi yazmış və həmin tarixdən 6 mart 2020-ci tarixinədək təhvil-təslim prosesində idi. Hazırda Ə.Baxşiyevanın "Avromed Company” QSC ilə birbaşa və dolayısı əlaqəsi mövcud deyil.
DİN-in Mətbuat Xidmətinin yaydığı məlumatda bildirilir  ki, ölkə ərazisində son günlər tibbi maskalara artan tələbatdan sui-istifadə edərək bu ləvazimatların real dəyərindən dəfələrlə baha qiymətə satışını həyata keçirməyə cəhd edən, habelə qaçaqmalçılıq yolu ilə ölkə hüdudlarından kənara çıxarmağa çalışan şəxslərə qarşı əməliyyat keçirib. 

"Tədbir zamanı yaranan vəziyyətdən sui-istifadə edərək qanunsuz yolla gəlirlərini artırmaq istəyən, ayrı-ayrılıqda fəaliyyət göstərən, aralarında xarici ölkə vətəndaşları da olan bir neçə dəstə ifşa edilib və onların hər bir üzvü saxlanılıb. Belə ki, əməliyyat zamanı İran İslam Respublikasının vətəndaşları Bahadur Davud, Moenifard Seyidməhəmməd, Saviz Amiryusif külli miqdarda tibbi maskaları satmaq istəyən zaman tutulublar. Həmçinin Baş İdarə əməkdaşları tərəfindən keçirilən əməliyyat zamanı Çin Xalq Respublikasının vətəndaşları Yang Kun və Yiming Liunun ölkədən qaçaqmalçılıq yolu ilə öz vətənlərinə göndərmək məqsədilə tədarük etdikləri külli miqdarda tibbi maskalar onların Bakı şəhəri Yasamal rayonunda kirayədə yaşadıqları mənzildən aşkar olunaraq götürülüb. Əməliyyat tədbirlərinin davamı olaraq Çin vətəndaşlarını külli miqdarda tibbi maska ilə təmin etməkdə şübhəli bilinən paytaxt sakini Arif İsmayılov da müəyyən edilərək saxlanılıb, - DİN-in məlumatda qeyd olunur.
Məlumatda deyilir ki, Baş İdarə əməkdaşları tərəfindən keçirilən daha bir tədbir zamanı Xaçmaz rayon sakini Elvin Balamətov, Bakı şəhər sakini Elşən Ələkbərov, eləcə də paytaxt sakinləri Aslan Musayev, Şahin Fərzəliyev və Vaqif Mehbalıyev tibbi maska satarkən saxlanılıblar:
"Bu şəxslər tibbi maskaları real dəyərindən dəfələrlə baha qiymətə satışa təqdim etdikləri üçün ifşa ediliblər. Baş İdarənin əməkdaşları tərəfindən keçirilən tədbirlər nəticəsində ümumilikdə 1 milyon 50 min ədəd tibbi maska müəyyən edilərək dəstə üzvlərindən maddi sübut kimi götürülüb. Aşkar edilən faktlarla bağlı Baş İdarədə araşdırmalar davam etdirilir". 

Xəbər lenti