Həqiqət Sosialist Hərəkatın üzvü Ənvər Cəlilovu dünən, yanvarın 30-da polisin saxladığı bildirilir. Onun divara poster (rəsmli divar elanı) yapışdırarkən saxlandığı söylənir. Bu barədə AzadlıqRadiosuna hərəkatın üzvləri məlumat veriblər.

Məlumata görə, Ənvər Cəlilov saxlanaraq Xətai Rayon Polis İdarəsinin 36-cı Polis Bölməsinə aparılıb və bir sutkadan çoxdur ki, oradadır. "Ənvərin taleyindən çox narahatıq", - deyə hərəkatın üzvləri bildiriblər. Hərəkat üzvlərinin deməsinə görə, həmin plakatda fevralın 9-da keçiriləcək Milli Məclisə seçkilərə boykot ifadə edilib: "Hərəkatımız seçkiləri boykot edir. Bizim bəyanatmıza görə hakimiyyət, onun məclisi və seçkiləri legitim deyil. Biz "Azad Müəssislər Məclisi!" şüarı ilə çıxış edirik. Bununla bağlı insanlarla görüşlər keçirir, flayerlər paylayır, posterlər yapışdırırdıq. Bakıda və Sumqayıtda çalışırıq. Posterlər yapışdırarkən mülki geyimli şəxslər yaxınlaşıb, o bölgədə çalışan yoldaşları tutmağa çalışıb. Polislərdən biri isə birbaşa heç nə demədən onun qollarını burmaq istəyib, yaranan qarışıqlıqdan 3 nəfər hərəsi başqa istiqamətə qaçıb. Ondan sonra Ənvərdən xəbər ala bilmədik".

Fəallar deyirlər ki, Daxili İşlər Nazirliyinin "102" xidmətinə şikayət zənglərindən sonra Ənvər Cəlilovun saxlanma yeri onlara deyilib. "Turan” agentliyi bu deyilənlərlə bağlı Xətai rayon 36-cı Polis Bölməsi ilə əlaqə saxlayıb. Agentliyin xəbərinə görə, oradan bildirilib ki, Ənvər Cəlilovun bölmədə olub-olmaması sualını cavablandıra bilməzlər, bununla bağlı Daxili İşlər Nazirliyin mətbuat xidmətinə müraciət etmək lazımdır.

Daxili İşlər Nazirliyin mətbuat xidmətinin rəhbəri Ehsan Zahidov isə agentliyə bildirib ki, Ənvər Cəlilovun saxlanması ilə bağlı deyilənləri dəqiqləşdirdikdən sonra məlumat verəcəklər. Rəsmilər istər Milli Məclisin, istərsə də hakimiyyətin başqa qollarının legitim sayilmamasi ilə bağlı fikirləri qəbul etmirlər. Ötən il dekabrın 5-də prezident İlham Əliyev Azərbaycan Respublikasının V çağırış Milli Məclisinin buraxılması və növbədənkənar seçkilərin fevralın 9-na təyin edilməsi haqqında sərəncam imzalayıb.

Ondan üç gün əvvəl, dekabrın 2-də isə Milli Məclis YAP-dan olan deputatların müraciətinə əsasən, parlamentin buraxılması və növbədənkənar seçkilərin təyin olunması xahişi ilə prezidentə müraciət etmişdi. YAP bu qərarı prezident İlham Əliyevin islahatlar kursuna dəstək məqsədilə verdiyini açıqlamışdı. Əslində isə, Azərbaycanda parlament seçkiləri bu ilin noyabrında keçirilməli idi. Müxalifət qüvvələrindən bəziləri bu seçkiləri boykot etməklə bağlı qərarını açıqlayıb. Onlar əsasən hesab edirlər ki, Azərbaycanda azad və ədalətli seçkilərdən ötrü minimum şərait belə yoxdur. Rəsmilər və Mərkəzi Seçki Komissiyasının rəhbərliyi onların fikirlərini qəbul etmirlər.