Hazırda həbsdə olan sabiq Baş prokuror Eldar Həsənovun hüquqlarını müdafiə edən vəkil Cavad Cavadov Türkiyə prezidenti Rəcəb Tattup Ərdoğanln Azərbaycana səfəri ərəfəsində olduqca sensasion status paylaşıb. Criminal.az xəbər verir ki, C.Cavadov paylaşımında Ərdoğanın həbsdə olduğu vaxtda E.Həsənovun həbsxanaya ona baş çəkməsindən bəhs edib:

"Bu gün Heydər Əliyevin ad günüdür və onunla, Türkiyənin hazırki Prezidenti Ərdoğanla və vəkili oldduğum Eldar Həsənovla baş vermiş maraqlı bir hadisəni bölüşmək istəyirəm. Rəcəb Tayyip Ərdoğan İstanbul Büyükşehir Belediye Başkanı olduğu vaxt dediyi bir şeirə görə 10 ay həbs cəzasına məhkum olunur və 26 mart 1999-cu il tarixdə cəzasını çəkmək üçün onu Pınarhisar Cezaevine salırlar. Həmin vaxt Azərbaycanın Baş Prokuroru olan Eldar Həsənovun Türkiyəyə rəsmi səfəri olur və mərhum Heydər Əliyev ona tapşırır ki, getsin Ərdoğanla görüşsün, ona salamını və bir sözünü çatdırsın. Eldar Həsənov gəlir Türkiyəyə, bütün rəsmi görüşlərini bir neçə günə keçirdir və rəsmi səfər hissəsi bitəndən sonra yollanır həmin cəza evinə. Burada gəlməyinin səbəbini söyləyir və pasortunu təqdim edir (pasport da təbii ki, diplomatik olur). Ərdoğanın nəyisiniz sorruşurlar, deyir tanıışıyam və Azərbaycanın Baş Prokuror olduğunu öyrənirlər. Bundan sonra maraqlı səhnə yaranır, aləm dəyir bir-birinə. Xeyli müddət gözlətdirdikdən sonra Eldar Həsənova bildirirlər ki, bağışlayın bizimlə getməlisiniz və aparırlar Hava Limanına, ordan da yola salırlar Bakıya".

"Mən anlayıram. Təsəvvür edin ki, Türkiyənin Baş Prokuroru Azərbaycana gələndə gedir hansısa cəza çəkmə müəssisəsinə və sakitcə istəyir həbsdə olan müxalifət lideri ilə görüşsün. Reaksiya necə olacağını proqnozlaşdırmaq o qədər də çətin deyil. P.S. Eldar müəllimdən "salamdan başqa hansı söz çatdırılmasını istənilmişdir" nə qədər soruşsam da dedi ki, onu deyə bilmərəm. Bu söhbəti də mənə ona görə danışdı ki, eşitmişdim bu söhbəti və həqiqət olub olmadığını, maraqlandım və Türkiyə mətbuatında artıq bu məlumatlar gedibdir", C.Cavadov qeyd edib.