Döyülmə fotosu paylaşılan qadın başı kəsilərək öldürüldü Döyülmə fotosu paylaşılan qadın başı kəsilərək öldürüldü

Döyülmə fotosu paylaşılan qadın başı kəsilərək öldürüldü
 Xəbərdarlıq: bu xəbərdə sarsıdıcı ola biləcək fotolar və mətn var.
Bir neçə ay əvvəl əri tərəfindən zorakılığa məruz qalması ilə bağlı fotosu yayılan Sevinc Məhərrəmova çərşənbə axşamı əri tərəfindən öldürülüb. Qadın hüquqları müdafiəçisi Gülnarə Mehdiyeva 24 yaşlı Sevincin başı kəsilərək öldürüldüyünü deyib. Bakı şəhəri Xəzər rayon prokurorluğu bildirir ki, hadisə Zirə qəsəbəsində baş verib, qadının əri, 42 yaşlı Füzuli Qarayev arvadını qonşusu Röyal Hüseynovun evində öldürüb.
Prokurorluğun məlumatında deyilir ki, Sevinc Məhərrəmova ilə əri arasında münaqişə yaranıb və Füzuli Qarayev "arvadının aralarında yaranmış mübahisədən sonra küsüb sığındığı qonşusu Röyal Hüseynovun evində olmasını bilib oraya gələrkən küçədə Röyal Hüseynovu və sonuncunun yanında fəhlə işləyən Ramil Bəşirovu bıçaqlamış, daha sonra evə daxil olaraq arvadı Sevinc Məhərrəmovaya çoxsaylı bıçaq xəsarətləri yetirərək onu öldürüb".
Prokurorluq Füzuli Qarayevin saxlandığını, Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlandığını bildirib.
Bir müddət əvvəl Sevinc Məhərrəmovanın bədənində qançır izlərini göstərən fotosu sosial mediada yayılmışdı. O, bir neçə ay öncə əri tərəfindən döyüldüyü üçün evdən qaçmışdı. Gülnarə Mehdiyevanın sözlərinə görə, o zaman onlar qadına kömək etməyə çalışıblar: 

"23 yaşlı qadının şəxsiyyət vəsiqəsi yox idi, ona şəxsiyyət vəsiqəsi aldıq, həkimlərə apardıq. Qadına iş tapdıq, anasıgildə qalırdı. Məhkəmə olmalı idi, amma əri məhkəməyə gəlmirdi". Gülnarə Mehdiyeva deyir ki, sonradan Sevinc Məhərrəmova ona bildirib ki, uşaqlarına görə əri ilə barışmalı olub.
Daxili İşlər Nazirliyinin KİV və İctimaiyyətlə əlaqələr şöbəsinin rəisi Elşad Hacıyev BBC News Azərbaycancaya bildirib ki, Sevinc Məhərrəmova döyülən vaxt onun şikayətini araşdırıb və Cinayət Məcəlləsinin 130-cu maddəsi əsasında cinayət işi qaldırılıb.
"Araşdırmanın nəticələri ilə bağlı cinayət işi başlanılıb. Toplanmış materiallar aidiyyəti üzrə rayon məhkəməsinə göndərilib. Həmin vaxt polis üzərinə düşən bütün qanunvericiliklə müəyyən olunan bütün tədbirləri həyata keçirilib".
Qadına zorakılıq yetirən ərinin niyə saxlanmaması ilə bağlı suala Elşad Hacıyev belə cavab verib ki, bu, məhkəmənin səlahiyyətində olan məsələ olub. Sevinc Məhərrəmovanın döyülmə məsələsinə görə azı 3 dəfə polisə müraciət etdiyi bildirilir. 


Xəbər lenti