Barəsində qiyabi həbs qərarı çıxarılan "Hafka" danışdı

Barəsində qiyabi həbs qərarı çıxarılan
Yasamal rayon məhkəməsinin qərarı ilə iş adamı Hafiz Məmmədov barəsində həbs qətimkan tədbiri seçilib. Dövlət Vergi Xidmətindən Hafiz Məmmədov istintaqa gəlməkdən boyun qaçırdığına görə onun barəsində ittiham elan edilməsi üçün axtarış haqqında qərar qəbul edildiyi bildirilib.
 Maraqlıdır ki, iş adamı axtarışa verilsə də, məsələ ilə bağlı bir qədər əvvəl mediaya açıqlama verib. O, "Qaynarinfo”ya açıqlamasında bu gün borclarını qaytardığını qeyd edib: "Mənim 4 şirkətim var idi. Şirkətlərimdə çalışan əməkdaşlara görə, Dövlət Sosial Müdafiə Fonduna (DSMF) 652 min manat borcum yaranmışdı. Şirkətlərim müflis olduğundan bunu ödəyə bilmədim. Məhkəmə də bu günə kimi vaxt vermişdi. Bu gün də həmin borcu ödədim”.
Hafiz Məmmədov indiyədək şirkətlərinin vergi borcu olmadığını da deyib: "Dövlətin vergisini hər kəs verməlidir. Mən heç vaxt vergidən yayınmamışam və bu işi özümə müqəddəs borc bilmişəm. İndiyə qədər dövlətə bir milyondan çox vergi ödəmişəm”.
++++++
Tanınmış iş adamı Hafiz Məmmədov Dövlət Vergi Xidmətinin İstintaq İdarəsi tərəfindən saxlanılıb. Saxlanmaya səbəb iş adamına məxsus müəssisələrin külli miqdarda vergi və məcburi sosial sığorta ödənişləri borcunun olmasıdır. O, məhkəməyə aparılıb və barəsində həbs qətimkan tədbiri seçilib.
Hazırda H.Məmmədov 1 saylı İstintaq Təcridxanasında saxlanılır. Bu gün onun barəsində çıxarılmış həbs qətimkan tədbiri barədə qərardan verdiyi apellyasiya şikayəti üzrə məhkəmə olacaq. Məhkəmə saat 17.00-a təyin olunub.
Eyni zamanda, Hafiz Məmmədovun nümayəndəsi virtualaz.org-a borclarının olduğunu təsdiqləyib. "Hafiz Məmmədovun həqiqətən də 700 min manat vergi borcu olub. O, bu borcun böyük hissəsini ödəyib və borcun qalığını ödəmək niyyətində olub”, - deyə iş adamının ətrafı bildirib.
Hafiz Məmmədovun nümayəndəsi onu da əlavə edib ki, iş adamı daşınmaz əmlakının bir hissəsini satmaqla vergi borcunu çoxdan bağlaya bilərdi. Lakin Hafiz Məmmədovun əmlakına həbs qoyulub və onunla bütün əməliyyatların aparılması mümkün deyil.

Xəbər lenti