Ramil Usubovun qohumu olan sabiq rəis şərikini gülləboran etdi - BAKIDA ATIŞMA

Ramil Usubovun qohumu olan sabiq rəis şərikini gülləboran etdi - BAKIDA ATIŞMA
Bakının Sabunçu rayonunun sabiq polis rəisi Rza Hacıyev  öz şərikini gülləboran edib. Criminal.az saytının əldə etdiyi məlumata görə, hadisə dekabrın 16-da Pirşağı qəsəbəsində baş verib.
R.Hacıyev Bakının məşhur  "Bədo"  restoranında şəriki olan Şirzad adlı şəxsin "Lexus" markalı avtomobilinə "Kalaşnikov" avtomatından atəş açıb.
Məlumata görə, silahlı insident zamanı xəsarət alan olmayıb. Atışmanın şəriklər arasında pul söhbəti üstündə baş verdiyi deyilir. İnsidentlə bağlı rəsmi qurumlar hələlik heç bir açıqlama verməyib.
Əldə etdiyimiz məlumata görə, R.Hacıyev saxlanılıb.
Xatırladaq ki, bir neçə il əvvəl R. Hacıyevin adı Türkiyədə tanınmış iş adamı Telman İsmayılova məxsus oteldə qadın qətlə yetirməkdə hallandırılmışdı. "Musavat.com" saytının  yazdığına görə, Antalyadakı "Mardan Palase" otelində R. Hacıyevin tanışı olduğu bildirilən 24 yaşlı Arzu Zeynalovanın üzərində zorakılıq əlamətləri olan meyiti aşkarlanıb. Məlumatda o da qeyd olunmuşdu ki, R. Hacıyevin döyərək öldürdüyü A. Zeynalova Daxili İşlər Nazirliyinin yüksək çinli əməkdaşının qızıdır. R.Hacıyev özü yayılan məlumatları təkzib etmişdi.
Onu da əlavə edək ki, R.Hacıyev Milli Qəhrəman Əlfi Hacıyevin qardaşı, sabiq daxili işlər naziri Ramil Usubovun qohumudur.
****
Daxili İşlər Nazirliyinin şöbə rəisi Elşad Hacıyev bildirib ki, Sabunçu Rayon Polis İdarəsinin 15-ci Polis Bölməsinə dekabrın 16-da saat 23 radələrində Pirşağı qəsəbəsi ərazisində qəsəbə sakini Rza Hacıyevin münaqişə zəminində həmyerlisi Şirzad Quliyevin idarə etdiyi avtomobilə odlu silahdan atəş açaraq hadisə yerini tərk etməsi barədə məlumat daxil olub.
Polis əməkdaşlarının keçirdikləri təxirəsalınmaz əməliyyat-axtarış tədbirləri nəticəsində R.Hacıyev saxlanılıb. Ondan "AKMS” markalı avtomat silahı, 2 ədəd patron və 1 ədəd patron darağı götürülüb. Hadisə zamanı xəsarət alan olmayıb, araşdırma aparılır.

Xəbər lenti