''Öhdəmdə olan 3 əlilimi də götürüb hansısa xarici ölkələrin birindən sığınacaq istəməyə vadar edilmişəm. Çünki azadlıqlarım çox məhdudlaşdırılıb. Həmin gündən sonra mən Heydər Əliyev Fonduna qəbula yazılmağa gedərkən uzaqdan məni görərkən dərhal polis çağırirlar və məni həbs edirlər...''. Bu fikirlər Autizm Defektoloji və Psixoloji Yardım Mərkəzi (ADPYM) İctimai Birliyinin sədri Çiçək Məmmədlinin daxili işlər naziri Vilayət Eyvazova ünvanladığı müraciətdə qeyd olunub.

Birlik sədri nazirə müraciətində son günlər üzləşdiyi problemlərə aydınlıq gətirib və ona kömək edilməsini xahiş edib: ''2022-ci il aprel ayında səhər satlarında H.Əliyev Fondunun qəbuluna yazılmaq üçün İdman və konsert kompleksinə getmişdim.

Əlimdə də Mehriban Əliyevaya problemlərlə bağlı müraciət məktubu var idi. Ora yaxınlaşdım orada olan mühafizəçilər mənə dedilər ki, bu gün yaza bilmərik,  get 3-cü gün gələrsən. Mən anlamadım niyə belə dedilər. Çünki ora məndən başqa da insanlar getmişdi və qəbula yazılmaq üçün içəri buraxılırdılar. Mən onlara xahiş etdim məhəl qoymadılar.

Sakitcə aralaşmaq istədim və aralaşarkən etirazımı bildirdim ki, neçə illərdir bura gəlirəm, nəinki problemlərimlə maraqlanirlar, heç cavab da ala bilmirəm. Sonra telefonu çıxarıb tanışımazəng etmək istəyəndə bir mühafizəçi kobud şəkildə mənə yaxınlaşdı və qolumu buraraq telefonu almağa cəhd etdi və biz onunla əlbəyaxa olduq. Sonra bir neçə nəfər də töküldü üstümə, məni yıxdılar, qolumu burdular, sürüdülər və telefonu əlimdən aldılar. Özümü də sürüyərək kənara çəkib yanıma da bir nəfər mühafizəçi polis qoydular, dedilər ki, gözlə səni aparacaqlar. Həmin əlbəyaxa zamanı telefonun səs və kamera sistemi, üz kaburası sındı, yararsız hala düşdü. Məni 20-cı polis bölməsinə gətirəndə orda məni tanıdılar.

Çünki mən 20 ildən artıqdır ki, Azərbaycanda Autizm problemi ilə məşğul oluram. Bu sahədə ilk təşkilat-Autizm Defektoloji və Psixoloji Yardım Mərkəzini yaratmı.am, bütün dövlət qurumlarına, cəmiyyətə autizmi anlada bilmişəm. O zaman "autizm” sözü heç termin kimi belə anlaşılmırdı. İndi Qanunvericilikdə autizmin yer alması məhz mənim gərgin əməyimin nəticəsidir. İki övladım autizmdən əziyyət çəkir, yoldaşım 1-cı Qarabağ müharıbəsi veteranıdır, 2-cı qrup əlildir, o da ruhi xəstəlikdən əziyyət çəkir, son üç ildə arabaya möhtac olaraq mənim yükümü daha da ağırlaşdırmışdır. Mənim ailəmdə həll ediləsi problemlərim çoxdur amma mən həmin gün ölkəmizdə imkansız ailələrin təlimə əli çatmayan evdə bağlı saxlanan və valideynləri tərəfindən şiddətə məruz qalan autizmli uşaqların problemlərinin həlli üçün Mehriban Xanımın qəbuluna yazılmağa getmişdim''.

Ç.Məmmədli qeyd edir ki, bu kimi hadisələr onun başına bir dəfə gəlməyib. ''Azərbaycan qanunlarına əsasən bizim sərbəst toplaşmaq, sözümüzü, problemlərimizi demək azadlıqlarımız qanunla tənzimləndiyi halda, bu haqda nəinki toplaşmağımız, bunu dilə gətirərərək Baki Şəhəri İcra Hakimiyyətinə yazaraq xahiş edərək bizə icazə verməsini deməyimiz bizi, şəxsən məni və ailəmi indiyəqədər hüqüq mühafizə orqanları,Prokurorluq və digər aidiyyatı qurumlar tərəfindən hədələnməyimə gətirib çıxarır. Cənab nazir, sizdən çox xahiş edirəm ki, bu məsələnin araşdırımasına sərəncam verəsiniz. Ümid edirəm ki, Qeyri Hökümət Təşkilatının rəhbəri olaraq səs verdiyim və seçdiyim Daxili İşlər Nazirliyi Yanında fəaliyyət göstərən İctimai Şura da bu məsələyə laqeyd qalmayacaq''.