Bakının Nəsimi rayonunda intihar hadisəsi baş verib. Nəsimi rayon prokurorluğundan verilən məlumata görə, hadisə noyabrın 15-də saat 16 radələrində qeydə alınıb. 1984-cü il təvəllüdlü Ramin Əliyevin Nəsimi rayonu, M.Zeynalabdıyev küçəsi 8 saylı binanın qarşısında özünə məxsus yivsiz ov silahı ilə baş nahiyəsinə atəş açaraq özünü öldürməsi barədə Nəsimi rayon prokurorluğuna daxil olmuş məlumat əsasında prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, iş üçün əhəmiyyət kəsb edən maddi sübutlar götürülüb və digər zəruri prosessual hərəkətlər yerinə yetirilib.

Fakta görə Nəsimi rayon prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb, zəruri ekspertizalar təyin edilib. İntiharın səbəblərinin araşdırılması məqsədilə mərhumun ailə üzvlərinin, qonşuların və digər şəxslərin ifadələri alınıb. Hazırda iş üzrə zəruri istintaq tədbirləri davam etdirilir. 

Criminal.az saytının əldə etdiyi məlumata görə, R.Əliyev iş adamı olub. Bakıda bina tikintisi ilə məşğul olan R.Əliyevin son iki il ərzində 20 milyon manat ziyan etdiyi bildirilir. 

O da qeyd edilir ki, R.Əliyevin yaxın günlərdə əkiz övladı dünyaya gəlsə də, onlardan biri tələf olmuşdu.